A Unión Europea : estrutura xeral

Abstract

O estudo da Unión Europea e o seu ordenamento xurídico insírese dentro do ámbito dos estudos xurídicos internacionais, no fenómeno do rexionalismo, isto é, no establecemento de mecanismos de cooperación entre Estados en diferentes áreas rexionais para alcanzar determinados obxectivos de interese común. Este fenómeno, que non é exclusivo do continente europeo, concretouse na creación de moi diferentes Organizacións Internacionais Rexionais, algunhas das cales van máis aló da mera cooperación intergobernamental e serven como canle para o desenvolvemento de procesos de integración. Este é o caso da Unión Europea, que constitúe un modelo único de Organización Internacional de integración á que os Estados cederon o exercicio de competencias soberanas e que deron lugar á creación dun novo sistema xurídico, o Dereito da Unión Europea, que goza de autonomía respecto do Dereito Internacional Público e dos Dereitos internos dos Estados membros, pero que está estreitamente relacionado con ambos os ordenamentos xurídicos. Esta materia ten como propósito introducir o alumnado no estudo da estrutura da Unión Europea e das peculiaridades do seu ordenamento xurídico. Trátase así de ofrecer unha visión xeral do funcionamento das institucións comunitarias e dos mecanismos e procedementos a través dos cales se elabora e se aplica o Dereito da Unión Europea (repartición de competencias, sistema de fontes, mecanismos de aplicación ou mecanismos de control), que facilite a comprensión dos trazos distintivos deste ordenamento xurídico peculiar e lle permita a aplicación das súas normas naqueles ámbitos do Dereito español que se vexan afectados por elas. Nesta materia non se busca examinar todos os ámbitos materiais – cada vez máis amplos– que son obxecto de regulación polo ordenamento xurídico da Unión Europea, senón que esta normativa comunitaria específica deberá ser estudada naquelas disciplinas do Dereito español que se vexan afectadas pola acción das institucións europeas, pois iso permitirá ofrecer así ao alumnado, desde un punto de vista material, unha perspectiva máis completa, que xa non debe quedar limitada ao estudo do Dereito positivo interno, senón que debe ter en conta o impacto da normativa comunitaria, que resulta cada vez máis importante