Ensinar e aprender ciencias na aula inclusiva. materiais multimedia e recursos para atender a déficits comunicativos e lingüísticos

Abstract

A investigación en educación científica (Campanario, 1999; García-Barros e Martínez Losada, 2001) indica que non se atende suficientemente ás necesidades de aprendizaxe dos alumnos e que nas clases de ciencias o obxectivo principal debería centrarse en habilidades de pensamento e razoamento científico máis que no libro de texto. Se isto é un feito: Como podemos atender as necesidades específicas das e dos estudantes con dificultades en comunicación lingüística na aula ordinaria? Que metodoloxía debemos integrar na aula de ciencias que sexa o suficientemente creativa e flexible para responder ás necesidades e características do alumnado con distintos niveis en competencia lingüística? Nesta comunicación pretendemos facer unha pequena revisión dalgunhas das premisas para atender á diversidade lingüística na aula inclusiva que xorden da investigación en Didáctica das Ciencias , por se poden ser de utilidade para os docentes de ciencias con alumnado xordo, inmigrante ou con diferentes niveis en competencia lingüística e dan pé a futuras investigacións relacionadas con este tema