Percepción social do cambio climático no alumnado de educación secundaria

Abstract

O estudo das percepcións sociais é relevante para comprender os sentidos, os significados e a postura que os suxeitos asumen ante fenómenos socioambientais complexos como o cambio climático. Este traballo presenta unha investigación de campo con estudantes de ensino secundario, cuxo obxectivo é coñecer as definicións grupais que elaboran sobre o cambio climático. Recorreuse a unha metodoloxía de carácter cualitativo, empregando unha técnica proxectiva para recoller respostas por escrito e orais. A análise dos datos realizouse seguindo un esquema predefinido de categorías. Os resultados mostran que as percepcións do alumnado atenden a un número limitado de elementos cun elevado grao de consenso. Préstase máis atención aos efectos e ás causas do cambio climático, en detrimento das posibles respostas ante o problema, as implicacións persoais ou os efectos na súa contorna próxima. Isto evidencia que, a pesar de que o cambio climático forma parte dos currículos de educación secundaria dende hai décadas, é necesario fomentar nas aulas unha alfabetización climática que, á par da formación científica, contribúa a identificar a gravidade da crise climática, desenvolvendo entre o alumnado competencias e actitudes comprometidas.