Presentación

Abstract

No desenvolvemento da Historia da vida cotiá, algo afastada no tempo queda xa a aparición das primeiras obras sobre esta temática publicadas pola editorial francesa Hachette nos anos 1930; máis próxima, a mediados da década de 1940, queda xa a monografía de H. Lefebvre Crítica de la vida cotidina, e máis recente, aínda que dos anos 1970, é a obra de F. Braudel Civilización material, economía y capitalismo. Siglos XV-XVIII, na primeira parte da cal cumpre coa súa “recomendación” feita en 1961 aos historiadores da necesidade de estudar “as estruturas do cotián”. No transcurso deste tempo ata a actualidade a Historia da vida cotiá foi adquirindo peso historiográfico dentro da renovada historia social ou, se se prefire, socio-cultural, tamén en España, aínda que dende tempos máis recentes por razón do seu atraso con respecto aos países europeos punteiros.