As expectativas educacionais e as disciplinas STEM en clave de xénero en Galiza: división do traballo vs igualdade de oportunidades

Abstract

A educación é un dos piares básicos para o desenvolvemento social, económico e persoal. Porén, existen certas disciplinas que se están asentando como sectores estratéxicos das economías actuais que atraen as miradas polas súas capacidades de xerar riqueza, coñecemento e dinámica socioeconómica. Estas son as ramas STEM, que agrupan distintas disciplinas das ciencias, tecnoloxías, enxeñerías e matemáticas. O obxectivo deste traballo é achegar evidencia empírica sobre as preferencias do alumnado en Galiza no que respecta á elección de profesións e ocupacións que pertencen ás ramas STEM. A representación feminina neste tipo de sectores é máis moderada que a masculina e, ademais, as disciplinas STEM reproducen a segregación sexual na división social do traballo baixo a dualidade produción-reprodución. Por outra banda, a moi reducida participación das mulleres nas ramas STEM ocasiona que as que participan estean sometidas a maior presión e cuestionamento sobre o seu potencial.