I Xornada Universitaria Galega en Xénero: roles de xénero en tempos de crise

Abstract

A I Xornada Universitaria Galega en Xénero celebrouse en xuño de 2013 en Santiago de Compostela baixo o lema «Roles de xénero en tempos de crise», co obxectivo de achegármonos aos temas de xénero cunha visión multidisciplinar, así como crearmos un punto de encontro e intercambio de ideas do persoal docente e investigador do sistema universitario galego interesado por este enfoque. Nun momento de crise económica, financeira, social e cultural, a Xornada centrouse nas repercusións que esta crise ten sobre os roles de xénero. Así, nela tratamos as seguintes tres áreas temáticas: políticas públicas de igualdade, coordinada pola Oficina de Igualdade de Xénero da USC; mulleres e mercado laboral, coordinada pola Oficina para a Igualdade de Xénero da UDC; e corresponsabilidade e conciliación, coordinada pola Unidade de Igualdade da Uvigo. A publicación que agora presentamos recolle os resultados da Xornada en forma de conferencias, relatorios das mesas redondas e comunicacións presentadas.