Dirección de empresas: conceptos básicos e evolución

Abstract

O persoal directivo ten que enfrontar hoxe en día novos retos. As funcións tradicionais da administración ―planificar, organizar, dirixir e controlar― deben ser levadas a cabo de forma axeitada para que a organización acade o éxito empresarial. Pero, ao contrario que antigamente, o desempeño destas funcións non só lles corresponde aos altos directivos, senón que se disemina entre os diferentes niveis da organización e dá como resultado organizacións máis descentralizadas e máis flexibles, capaces de adaptarse rapidamente aos cambios que se producen no seu contorno. Polo tanto, o éxito das organizacións depende da dirección eficiente das persoas e dos recursos, o que permitirá acadar os obxectivos da organización afrontando á súa vez os cambios que se producen no seu contorno. A materia de Fundamentos de Dirección de Empresas recolle os contidos básicos de formación que toda persoa graduada en Dirección e Administración de empresas debe coñecer. Ao longo da materia irase afondando no papel que desempeña o persoal administrador dentro da estrutura empresarial, así como as principais funcións directivas que debe desenvolver para conseguir os obxectivos marcados dentro dun contexto global, cambiante e altamente competitivo. Pola súa parte, a primeira unidade didáctica ten por finalidade situar o alumnado no mundo da administración empresarial, e na vida cotiá dos seus principais integrantes, o persoal directivo. Para iso, comezarase analizando o concepto de empresa e organización, dando un repaso ás principais teorías sobre a administración de empresas, para seguir coa análise do traballo directivo e as características que definen este traballo. Nesta segunda parte da unidade farase especial fincapé, por un lado, na definición das capacidades e roles que todo o persoal directivo precisa para o correcto desempeño do seu posto e, por outro lado, na identificación dos factores sobre os que se asenta o posible éxito profesional do administrador. A unidade está deseñada para ser desenvolvida en 10 horas (4 horas de sesión expositiva e 6 horas de sesión interactiva).