Tributación da transferencia da tecnoloxía: a fiscalidade e a sociedade do coñecemento como vía de saída da crise

Abstract

Esta unidade didáctica denominada “Tributación da transferencia de tecnoloxía. A fiscalidade e a sociedade do coñecemento como vía de saída da crise”, forma parte da materia «Dereito Tributario Internacional», optativa xeral de 1º e 2º ciclo da Licenciatura de Dereito. Nesta materia estúdanse os aspectos máis relevantes da fiscalidade das rendas obtidas por persoas físicas ou xurídicas nun contexto internacional. Nunha primeira parte da materia, abordaranse as notas conceptuais básicas do Dereito Tributario Internacional e o Dereito Comunitario Tributario, xa que o segundo pode chegar a influír de modo decisivo no primeiro. A continuación, analizaranse as peculiaridades do fenómeno da dobre imposición e exporanse as principais medidas para evitala. Neste senso, será determinante o estudo dos Modelos de Convenios de Dobre Imposición, e, en especial, o Modelo da OCDE, debido ao uso xeneralizado polos Estados á hora de asinar os convenios para evitar a Dobre Imposición. Despois entrarase de cheo no estudo individualizado da fiscalidade internacional de cada tipo de renda, para rematar facendo alusión a dous grandes temas de cerre da materia: a fraude e a evasión fiscal internacional e a resolución de conflitos no Dereito Internacional Tributario.