A economía galega: breve balance das tres últimas décadas e perspectivas de futuro

Abstract

Nas últimas tres décadas, Galicia mellorou significativamente o seu nivel de desenvolvemento, reduciu a pobreza e modernizou a súa estrutura produtiva, pasando dunha economía agraria a outra baseada nos servizos e cun sector industrial competitivo, especialmente -pero non só- nos eidos da automoción, téxtil e alimentación. A pesar destes avances, o país perdeu peso demográfico e económico, non logra reter talento novo e cualificado, e mantén unha posición periférica en Europa debido á súa moderada capacidade innovadora. A crise de 2008 golpeou con dureza o emprego, mais Galicia resistiuna algo mellor ca outras rexións grazas ao menor endebedamento das familias e á súa competitividade exterior. O gran desafío futuro é artellar unha estratexia de innovación adaptada aos sectores tradicionais, mellorar as comunicacións internas e externas, e reforzar as institucións para atraer e reter actividades de alto valor engadido.