Lingua galega e identidade

Abstract

A lingua galega ocupou, dende o Rexurdimento, unha posición destacada como elemento identitario dos galegos. Para o galeguismo decimonónico de herdanza herderiana, era un símbolo central na delimitación do grupo etnolingüístico, idea que foi recollida e transmitida polo nacionalismo galego, dende as Irmandades da Fala até o momento actual. Asemade, un dos argumentos explicitamente invocados pola Lei de Normalización Lingüística a favor da protección do galego foi a función deste na preservación da "personalidade colectiva" dos galegos. Para termos unha panorámica máis completa da importancia do idioma propio na representación identitaria, faise necesario contrapoñer esta visión dende arriba, sostida por unha parte das elites políticas e intelectuais galegas, á visión dende abaixo tal como é expresada polos falantes comúns. Tal é o obxectivo desta contribución, centrada en describir a relación entre lingua e identidade a partir da análise das opinións dunha mostra de entrevistados de diferentes grupos sociolingüísticos obtida no marco do proxecto do Mapa Sociolingüístico de Galicia (1990-1995).