A costela galega de Eça de Queirós

Abstract

A costela galega de Eça de Queirós reconstrúe, con método documental e intención divulgativa, a ascendencia galega do grande escritor portugués. Carlos Quiroga segue a liña materna de Eça, revisa partidas parroquiais, rexistros sacramentais, escrituras e documentos militares, e demostra que un bisavó, Anselmo Vicente do Areal, era natural de Santa Mariña de Areas (comarca de Tui) e asentouse en Valença do Minho, onde formou unha ampla descendencia. O estudo contrasta esta documentación coas biografías clásicas e emenda confusións sobre lugares de nacemento e apelidos, explicando como se transmitiron erros nos rexistros posteriores. Ademais de describir os primeiros anos de Eça e o contexto familiar, contextualiza a vida da súa avoa e os anos de crise e invasións napoleónicas na raia, para entender mobilidades, matrimonios e redes locais. O resultado é unha microhistoria de fronteira que ilumina afinidades históricas entre Galiza e Portugal. Inclúe anexos con transcricións e reproducións documentais.