Proposta de prevención do acoso escolar na aula de Educación Infantil

Abstract

O acoso escolar é unha realidade da nosa sociedade que afecta directamente á institución educativa. Este caracterízase por ter uns participantes concretos e diversas clasificacións sobre a súa tipoloxía, presentando certos factores causais e de risco que fomentan a súa aparición. Todas estas singularidades non distan daquelas que diferenciaban esta problemática na súa orixe, a finais do século XX, aínda que actualmente se focaliza a atención na súa prevención. O proceso preventivo é fundamental para frear esta cuestión centrándose, no caso do presente documento, nos diferentes axentes da comunidade educativa, concretamente nas familias, o corpo docente e as crianzas. Deste modo, preséntase unha proposta de prevención caracterizada polo seu aspecto lúdico que pretende aportar información sobre o bullying e ferramentas para combater as posibles situacións negativas. Por último, o traballo co alumnado enfócase cara a aprendizaxe da convivencia, a intelixencia emocional, a empatía e a valoración da diversidade como eixos para construír relacións sas e evitar a violencia. Con todo isto téntase avanzar cara a concienciación e sensibilización ante o tema, incentivando o aumento da participación da sociedade en programas deste tipo.