A arte relixiosa no arciprestado de Seaia

Abstract

Esta tese de doutoramento aborda o estudo da arte relixiosa no arciprestado de Seaia, situado na provincia da Coruña, en Galicia (España). Este arciprestado pertence á arquidiocese de Santiago de Compostela. Catalogamos, analizamos e estudamos as obras de arquitectura, retablística, escultura e ourivería, en vinte e cinco parroquias de tres municipios: Cabana de Bergantiños, Malpica de Bergantiños e Ponteceso. Tamén incluímos ermidas e capelas, non só eclesiásticas senón tamén privadas. As obras de arte abranguen desde a Idade Media ata a actualidade. Na edificación dos templos destacaron os canteiros da comarca de Terra de Montes (Pontevedra). A escultura -retablos e imaxes- está vinculada sobre todo aos talleres de Santiago de Compostela, foco artístico indiscutible do arcebispado, aínda que non faltan obras procedentes de Noia e Cee, ou de Madrid e Cataluña. Na ourivería tamén prima a orixe compostelá, á que hai que engadir pezas da cidade da Coruña; mención á parte merecen as alfaias de importación chegadas de Córdoba, Valladolid e mesmo de Popayán en Colombia.