A base xenética da mandíbula Habsburgo

Abstract

Neste traballo abordamos a relación entre a “mandíbula Habsburgo”, un claro exemplo de prognatismo mandibular, e a alta consanguinidade nesta dinastía a través dunha análise multivariante por compoñentes principais. Os datos manexados proveñen do exame clínico de 18 trazos dismórficos indicativos de prognatismo mandibular e deficiencia maxilar en retratos pictóricos de 15 personaxes da dinastía Habsburgo. Atopamos unha asociación positiva estatísticamente significativa entre o prognatismo mandibular e o coeficiente de consanguinidade, indicando unha base xenética recesiva para este trazo. Ademais, este traballo proporciona a primeira evidencia de depresión consanguínea sobre un trazo do rostro humano.