Instrución 1/2024 da Secretaría Xeral da USC sobre a organización do espazo de traballo en intranet das unidades administrativas e a creación de arquivos dixitais de oficina.

Abstract

A irrupción da Administración Electrónica na actividade administrativa e de xestión da Universidade de Santiago de Compostela (USC) trouxo aparellado un importante cambio na forma de traballar, nos medios e recursos de tramitación e na maneira de conformar, arquivar e preservar as evidencias documentais que testemuñan o importante servizo público que presta a USC á comunidade universitaria e á sociedade en xeral. De igual modo, é importante subliñar que a documentación electrónica que se está a crear nos distintos servizos e unidades administrativas é de vital importancia tanto desde un punto de vista xurídico -por dar soporte e valor probatorio aos dereitos e deberes das persoas administradas e do propio persoal da USC- como pola súa consideración legal de patrimonio documental desde o mesmo momento da súa creación. Tomando en consideración estas premisas e valorando a problemática subxacente á tramitación electrónica e os riscos que contempla, faise necesario normalizar a organización da documentación electrónica, a conformación de expedientes dixitais e o seu arquivado nas unidades ou servizos.